Kreu i Partisë SocialDemokrate, Tom Doshi, ka reaguar për herë të parë nga Korça për përplasjen në distancë me Partinë Socialiste, partinë që ai dikur e ka mbështetur dhe që drejton vendin prej tre mandatesh. Në një deklaratë të drejtpërdrejtë, Doshi theksoi se PSD po lufton për mandatet e saj, por jo për të sjellë opozitën në pushtet.
“Ne jemi partia që kemi bashkuar të gjithë votuesit, të majtë e të djathtë. Po luftojmë për mandatin tonë, por jo për të rikthyer Berishën. Ne nesër sërish mund të bashkëpunojmë me PS, por nuk më vjen mirë nga mënyra si po sillen me ju këtu në Korçë dhe në gjithë Shqipërinë,” tha Doshi, duke akuzuar socialistët për presione ndaj qytetarëve.
Sipas tij, në prag të zgjedhjeve, PS po ushtron presion ndaj fermerëve, bizneseve dhe të punësuarve në administratë. “Kjo nuk është Europë. Nëse duam të jemi pjesë e BE-së, nuk mund të ushtrojmë dhunë psikologjike për votën,” u shpreh ai.
Tom Doshi theksoi se PSD nuk ka ardhur për t’i prishur punët PS-së, por për të kërkuar mbështetje për veten. “Votoni PSD-në! Ne jemi forca e tretë politike. Nuk kërkojmë të rrëzojmë askënd, por të marrim mandatin që na takon,” u shpreh ai.
Pavarësisht kritikave ndaj socialistëve, Doshi i dha fund çdo dileme për koalicionet e paszgjedhjeve: “PSD nuk do të sjellë kurrë Berishën në pushtet. Pavarësisht mospajtimeve, ne do të vijojmë të bashkëpunojmë me PS.”
