Deputeti i Partisë Demokratike, Dashnor Sula, ka reaguar sërish pasi ish-kryeministri Sali Berisha e la jashtë listës së kandidatëve për deputetë për zgjedhjet e 11 majit.
Ai shpreh shqetësimin se, pas këtyre zgjedhjeve, mijëra qytetarë nuk do të kenë asnjë përfaqësues në Parlament, pasi në listën e mbyllur të PD për qarkun e Elbasanit nuk është përfshirë asnjë kandidat nga disa bashki të zonës.
Sula bën të ditur se ka tentuar të komunikojë me kreun e PD-së, por vendimi për të mos pasur përfaqësues nga këto bashki ishte tashmë i marrë.
“Pavarësisht përpjekjeve të mia të vazhdueshme për të pasur një bisedë me kryetarin e PD dhe me persona pranë tij, u vendos që këto bashki më mirë të mbeten pa përfaqësues sesa të isha unë në listë,” shprehet ai.
Ai thekson se në zgjedhjet e vitit 2021, bashkitë Peqin, Belsh, Cërrik, Gramsh, Librazhd dhe Prrenjas i siguruan Partisë Demokratike 26.583 vota, të mjaftueshme për tre mandate në Kuvend. Megjithatë, sipas tij, këta qytetarë tani nuk kanë asnjë përfaqësues nga zonat e tyre në listën e PD.
Duke iu referuar primareve të Partisë Demokratike, Sula thotë se demokratët e disa bashkive të qarkut e zgjodhën atë si përfaqësuesin e tyre me vota, por ai u përjashtua nga listat për shkak të qëndrimeve të tij.
Në përfundim, deputeti kritikon vendimin e PD-së dhe thekson se një pjesë e elektoratit demokrat në Elbasan është lënë pa përfaqësim në zgjedhjet e 11 majit.
