1 Prilli është dita e fundit për dorëzimin e Deklaratës Vjetore të të Ardhurave (DIVA), pasi afati fillestar, 31 Marsi, u shty për shkak të festës së Fitër Bajramit.
Sipas Drejtorisë së Përgjithshme të Tatimeve, këtë vit pritet që mbi 144 mijë individë të plotësojnë deklaratën, për shkak të uljes së pragut të detyrimit nga 2 milionë lekë në 1.2 milionë lekë të ardhura vjetore bruto.
Kush është i detyruar të plotësojë DIVA 2024?
Deklarimin duhet ta kryejnë individët që gjatë vitit 2024 kanë pasur:
- Të ardhura bruto prej 1.2 milionë lekësh ose më shumë.
- Më shumë se një punëdhënës gjatë vitit, edhe nëse kjo ka ndodhur vetëm për një muaj.
- Të ardhura nga burime të tjera si qiradhënia për individë të paregjistruar apo fitimet nga platforma online si Booking dhe Airbnb, mbi 50 mijë lekë.
Edhe ata që kanë pasur më shumë se një pagë, pavarësisht shumës së fituar, duhet ta dorëzojnë deklaratën.
Të ardhurat nga platformat online dhe rrjetet sociale
Një aspekt i ri i këtij viti është përfshirja e të ardhurave nga platformat dixhitale. Administrata tatimore ka identifikuar rreth 33 milionë euro të ardhura të gjeneruara nga individë përmes platformave si META, YouTube dhe Google, të cilat duhet të deklarohen në DIVA 2024.
Vështirësi teknike dhe penalitete
Në ditët e fundit, për shkak të fluksit të lartë të përdoruesve, sistemi online i tatimeve ka hasur probleme teknike, duke shkaktuar vështirësi për disa tatimpagues.
Sistemi e-Filing automatikisht plotëson të dhënat për të ardhurat nga pagat dhe tatimin e paguar, por individët duhet të verifikojnë dhe plotësojnë çdo informacion të nevojshëm.
Ata që nuk dorëzojnë deklaratën brenda afatit do të gjobiten me 3,000 lekë.
Për më shumë informacion, mund të vizitoni faqen zyrtare të Tatimeve: www.tatime.gov.al.
