Reagim i Policisë së Shtetit
Policia e Shtetit shpreh shqetësimin e saj për deklaratat e përsëritura nga përfaqësues të Partisë Demokratike, të cilat përpiqen të minojnë besimin ndaj punës së saj dhe integritetin e strukturave të rendit.
Këto deklarata nuk janë të reja, por vijimësi e akuzave të pabazuara që synojnë të njollosin punën e mijëra punonjësve të Policisë së Shtetit dhe drejtuesve të saj, të cilët çdo ditë angazhohen me profesionalizëm dhe përkushtim në shërbim të ligjit dhe qytetarëve.
Policia e Shtetit vijon të gëzojë vlerësime pozitive nga partnerët ndërkombëtarë dhe agjencitë më të rëndësishme ligjzbatuese në arenën ndërkombëtare, duke dëshmuar standarde të larta në luftën kundër krimit dhe zbatimin e ligjit.
Theksojmë se nuk ka pasur asnjë rast refuzimi për të përmbushur detyrat ligjore. Çdo përgjegjësi është përmbushur me korrektësi, profesionalizëm dhe në përputhje me ligjet në fuqi.
Sulmet e vazhdueshme ndaj Policisë së Shtetit synojnë të godasin jo vetëm drejtuesit dhe strukturat, por dhe vetë besimin e qytetarëve ndaj këtij institucioni, i cili, sipas vlerësimeve të organizatave ndërkombëtare, mbetet një ndër institucionet më të besuara në vend.
Policia e Shtetit mbetet e përkushtuar ndaj aleancës me qytetarët dhe ligjin. Çdo punonjës që shkel këtë besim dhe përfshihet në veprime të paligjshme, do të përballet me pasojat ligjore dhe do të përjashtohet menjëherë nga radhët tona.
Në këtë periudhë elektorale, Policia e Shtetit garanton se do të qëndrojë e paanshme, e përqendruar vetëm në detyrën e saj për të ruajtur rendin, sigurinë dhe integritetin e procesit zgjedhor.
