Agjencia prestigjioze ndërkombëtare e lajmeve Reuters i ka kushtuar një artikull zhvillimeve zgjedhore në Shqipëri, ku thekson se kryeministri Edi Rama është në rrugë të sigurt drejt një mandati të katërt. Sipas raportimit, rezultatet paraprake tregojnë një epërsi të theksuar të Partisë Socialiste në zgjedhjet parlamentare të së dielës.
Deri në përpunimin e 30% të votave, PS kishte siguruar 53% të tyre, duke lënë mbrapa Partinë Demokratike të udhëhequr nga ish-kryeministri Sali Berisha, e cila kishte marrë 34%, sipas të dhënave zyrtare të komisionit zgjedhor.
Reuters vë në dukje se Rama, i cili është në pushtet që nga viti 2013, ka ndërtuar një rrjet të fuqishëm ndikimi gjatë këtyre 12 viteve, ka përfituar nga një ecuri pozitive ekonomike dhe ka ruajtur një profil të favorshëm në arenën ndërkombëtare.
Nëse rezultatet paraprake konfirmohen, kryeministri do të ketë katër vite të tjera për të ndjekur objektivin e tij ambicioz – anëtarësimin e Shqipërisë në Bashkimin Evropian deri në vitin 2030. Megjithatë, ekspertët e konsiderojnë këtë afat si tepër optimist.
Artikulli ndalet edhe te sfidat e mandatit të tretë të Ramës, përfshirë tensionet politike me opozitën dhe disa skandale të bujshme korrupsioni.
“Fituesi ishte i pritshëm”, shprehet për Reuters një qytetar i moshuar, Haxhi Koleci. “Kanë bërë një punë të mirë deri tani. Kemi përparuar shumë që nga viti 2013.”
Për herë të parë, mbi 200 mijë shqiptarë që jetojnë jashtë vendit morën pjesë në votim. Rezultatet përfundimtare priten të shpallen brenda të hënës ose të martës.
