Një javë para zgjedhjeve vendore, kryeministri Edi Rama lëshoi një paralajmërim publik ndaj kryebashkiakut socialist të Vaut të Dejës, Kristian Shkreli: “Mos luaj me dy porta, Kristian.” Mesazhi u interpretua si një sinjal për besnikëri politike në një zonë ku rezultati përfundimtar solli një surprizë të madhe.
Pas numërimit të votave, Vau i Dejës rezultoi e vetmja bashki në vend ku Partia Socialiste zbriti në vendin e tretë. Sipas të dhënave zyrtare nga KQZ-ja, Partia Socialdemokrate e Tom Doshit mori 5951 vota, duke u renditur e para. Në vend të dytë u pozicionua koalicioni i Partisë Demokratike me 4698 vota, ndërsa PS-ja e Ramës mori vetëm 2482 vota, duke zbritur në vendin e tretë – një goditje e rëndë në një bastion që dikur konsiderohej i sigurt.
