Sekretari i Përgjithshëm i Partisë Demokratike, Flamur Noka, deklaroi në një prononcim për Top Channel se PD nuk do t’i njohë zgjedhjet, duke akuzuar Partinë Socialiste për manipulim të rezultatit.
“Për ne këto zgjedhje janë të pavlefshme,” u shpreh Noka.
Ai theksoi se prej vitit 2017, sipas tij, regjimi i Edi Ramës është forcuar përmes kontrollit financiar dhe strukturave të paligjshme elektorale. “A ka pasur ndonjëherë votë të lirë në Shqipëri? Kurrë. Ne nuk dorëzohemi. Opozita po bën pjesën e saj për të mbrojtur demokracinë, por nuk mund ta mbrojë e vetme.”
Noka falënderoi komisionerët dhe numëruesit për punën, duke shtuar se “vota në kuti nuk është prekur.” Ai akuzoi se qeveria ka ndërtuar një sistem survejimi mbi qytetarët, ndërsa kërkoi reagim nga SPAK për shkeljet që, sipas tij, ndodhin edhe në diasporë.
Deri më tani janë numëruar rreth 70% e votave, ku Partia Socialiste ka siguruar 82 mandate, ndërsa Partia Demokratike 52.
