Charlotte “Betty” Webb, një nga gratë e fundit që mori pjesë në operacionet sekrete të Bletchley Park gjatë Luftës së Dytë Botërore, ka ndërruar jetë në moshën 101-vjeçare.
Si pjesë e shërbimit sekret britanik, ajo luajti një rol kyç në deshifrimin e mesazheve të koduara të ushtrisë naziste, të njohura si “Enigma”, duke ndihmuar aleatët në luftën kundër Gjermanisë. Procesi i dekriptimit u udhëhoq nga matematikani i njohur Alan Turing dhe konsiderohet si një faktor vendimtar për fitoren e aleatëve.
Webb, e lindur në Wythall, Worcestershire, u rekrutua në vitin 1942, kur ishte vetëm 18 vjeç, dhe punoi në bazën sekrete të Bletchley Park. Më vonë, ajo u transferua në Pentagon, ku ndihmoi forcat amerikane në përpjekjet për të zbërthyer kodet japoneze në fund të luftës.
Për kontributin e saj, ajo u nderua me titullin Anëtare e Urdhrit të Perandorisë Britanike (MBE) dhe në vitin 2021, në moshën 97-vjeçare, mori Legjionin e Nderit nga Franca.
Lajmin për ndarjen e saj nga jeta e konfirmoi Korpusi i Ushtrisë Mbretërore të Grave në Mbretërinë e Bashkuar, duke e përshkruar si një figurë frymëzuese për breza të tërë.
