Meta, kompania që zotëron Facebook dhe Instagram, po shqyrton mundësinë e prezantimit të një shërbimi abonimi në Mbretërinë e Bashkuar, i cili do t’u mundësonte përdoruesve akses pa reklama në këto platforma.
Ky hap vjen pas një vendimi ligjor të fundit, ku kompania pranoi të ndalonte reklamimin e synuar për një grua britanike pas një beteje të gjatë gjyqësore.
Që prej vitit 2023, Meta ka ofruar opsione abonimi pa reklama në vendet e Bashkimit Evropian, fillimisht me një tarifë prej 9.99 euro në muaj, e cila më vonë u ul në 5.99 euro.
Sipas BBC, përdoruesit mund të duhet të zgjedhin midis pranimit të reklamave të personalizuara ose pagesës për një eksperiencë pa reklama. Meta ka deklaruar se po punon “në mënyrë konstruktive” me autoritetin britanik të mbikëqyrjes së privatësisë për këtë çështje.
Mediat sociale, përfshirë Meta-n, mbështeten kryesisht në të ardhurat nga reklamimi, i cili përbën mbi 96% të të ardhurave të kompanisë. Meta argumenton se reklamimi i personalizuar lejon që platformat e saj të mbeten falas për përdoruesit.
Ndërkohë, disa media, si Daily Mail, Independent dhe Guardian, aplikojnë modelin “prano reklamat ose paguaj” për akses në përmbajtjen e tyre. Megjithatë, aktivistët theksojnë se një qasje e tillë mund të mos jetë në përputhje me rregullat britanike të mbrojtjes së të dhënave.
