Procesi i numërimit të votave preferenciale vijon në njësitë zgjedhore të Patosit dhe Fierit, ndërsa në bashkinë Roskovec është përmbyllur, ku Ilirjan Musko ka dalë në krye. Në Mallakastër, kandidati socialist Klevis Jahaj prin me një diferencë të konsiderueshme ndaj rivalëve të tij.
Partia Socialiste parashikohet të sigurojë 7 mandate përmes listës së hapur në qarkun Fier. Deri më tani, më i votuari mbetet Klevis Jahaj, i ndjekur nga Asfloral Haxhiu dhe Ceno Klosi. Ndërkohë, Zegjine Çaushi, e njohur si një fenomen në rrjetet sociale, ka arritur një rezultat të jashtëzakonshëm në Roskovec dhe është renditur mes fituesve.
Deputeti aktual Nusret Avdulla rezulton jashtë listës së fituesve deri në këtë fazë të numërimit. Ndërkohë, në KZAZ nr. 60 ka nisur numërimi i kutive të para.
Në këtë qark, Partia Demokratike nuk ka arritur të sigurojë as mandatin e pestë në listën e mbyllur. Kandidatët kryesorë të renditur nga PD janë Gazment Bardhi, Luan Baçi, Brunilda Haxhiu dhe Saimir Korreshi.
