Gjykata Penale e Tiranës ka vendosur sot të heqë masën e pezullimit nga detyra për drejtorin e Agjencisë së Mbikëqyrjes Policore (AMP), Florian Sulejmani. Vendimi u mor pas kërkesës së prokurorit Valentin Preci dhe u firmos nga gjyqtarja Armela Hasantari.
Masa e pezullimit ishte vendosur më herët nga Gjykata e Beratit, e cila ndërkohë kishte shpallur moskompetencën për shqyrtimin e çështjes. Seanca në Tiranë u zhvillua me dyer të mbyllura, ku prokurori argumentoi se nuk plotësoheshin kushtet ligjore për të mbajtur në fuqi pezullimin nga detyra.
Sipas organit të akuzës, urdhri i Sulejmanit për transferimin e dy oficerëve – njëri në Dibër dhe tjetri në Fier – nuk kishte sjellë pasoja, pasi funksionimi i AMP nuk ishte penguar dhe oficerët mund të zëvendësoheshin.
