Gjykata dhe Prokuroria e Beratit kanë ndërmarrë një veprim të paprecedentë, duke shkelur në mënyrë flagrante jo vetëm Kushtetutën, por edhe ligjet themelore që rregullojnë funksionimin e drejtësisë dhe institucioneve shtetërore në Shqipëri. Pezullimi nga detyra i Drejtorit të Përgjithshëm të Agjencisë së Mbikëqyrjes Policore (AMP), Florian Sulejmani, është një akt që bie ndesh me ligjin për vetë AMP-në, si dhe me ligjin për SPAK-un dhe Gjykatën e Posaçme.
Sipas legjislacionit aktual, hetimi dhe gjykimi i drejtuesve të institucioneve qendrore ose të pavarura i takon vetëm SPAK-ut dhe Gjykatës së Posaçme. Në vend që ta referonte çështjen pranë këtyre institucioneve kompetente, Prokuroria e Beratit vendosi të marrë vetë në dorë fatin e një drejtuesi të një institucioni të nivelit qendror, pa pasur kompetencë ligjore.
Në njoftimin për shtyp, Prokuroria e Beratit deklaroi me krenari se kishte analizuar ligjin për Policinë Gjyqësore dhe ligjin për AMP-në. Por, ajo ka bërë një interpretim tërësisht të gabuar. Ligji për AMP-në, konkretisht neni 16, është i qartë: Drejtori i Përgjithshëm ka të drejtë të emërojë, transferojë, lirojë dhe përjashtojë punonjësit e Agjencisë, përfshirë edhe punonjësit administrativë.
Pra, ku është vepra penale në transferimin e disa punonjësve, kur kjo është pjesë e kompetencës ligjore të Drejtorit të Përgjithshëm? Çfarë shkeljeje ka kryer drejtuesi i AMP-së kur ka zbatuar tekstualisht një dispozitë ligjore?
Veprimi i Prokurorisë së Beratit është jo vetëm i pajustifikueshëm, por flet për një keqinterpretim të thellë – apo më keq, për një ndërhyrje me prapavijë. Madje, ajo ka kërkuar edhe masë sigurie në gjykatë, pa ia deleguar çështjen Prokurorisë së Posaçme, siç e kërkon ligji.
Për më tepër, Prokuroria e Beratit pretendon se ekzistojnë “shkaqe të rëndësishme që vënë në rrezik marrjen ose vërtetësinë e provës”, duke e justifikuar masën e pezullimit. Ndërkohë që, e gjithë kjo bazohet në faktin se drejtori i AMP-së ka transferuar disa oficerë të Policisë Gjyqësore – një kompetencë që i njihet me ligj.
Ligji për Policinë Gjyqësore (neni 10, pika 1, shkronja c) e përcakton qartë: transferimi i oficerëve të Policisë Gjyqësore bëhet me propozim të titullarit të institucionit ku ata ushtrojnë funksionin. Këtë ka bërë edhe Drejtori i AMP-së.
Gjithashtu, neni 62, pika 5, e ligjit për AMP-në parashikon që për transferimin e punonjësve të AMP-së, që gëzojnë atributet e Policisë Gjyqësore, zbatohen edhe kriteret e ligjit për Policinë Gjyqësore – por pa e përjashtuar kompetencën e drejtorit për të propozuar dhe vendosur mbi këto lëvizje.
Në këtë rast, nuk kemi të bëjmë me një vepër penale, por me ushtrim normal të detyrës. Nëse Prokuroria e Beratit e ka bërë këtë veprim me vetëdije, atëherë vetë prokurori dhe gjyqtari që kanë marrë këtë vendim duhet të hetohen për shpërdorim detyre. Sepse në thelb, ata kanë vepruar si një grup i organizuar që ka marrë në dorë kompetencat e një organi kushtetues si SPAK-u.
Ligji për SPAK-un është i qartë: neni 75, pika a) përcakton se SPAK ka kompetencë për të hetuar dhe gjykuar drejtues të institucioneve të pavarura ose të përcaktuara në Kushtetutë. AMP-ja është një prej tyre. Atëherë, përse Prokuroria e Beratit mori këtë nismë? Pse nuk u referua SPAK-ut? A kemi të bëjmë me ndërhyrje, presione apo interesa të tjera?
Në fund, kjo ngjarje tregon një fenomen të rrezikshëm: vendimmarrja jashtë kompetencave ligjore, keqinterpretimi i qëllimshëm i ligjeve dhe zëvendësimi i drejtësisë me arbitraritet. Ky është një dëm i madh institucional që duhet të ndalet menjëherë, nëse duam një shtet ligjor që respekton rregullat e veta.
Shkrimi i takon VoxNews https://www.voxnews.al/fokus/pezullimi-i-drejtorit-te-amp-se-gjykata-dhe-prokuroria-e-beratit-perdhosen-i89923?fbclid=IwZXh0bgNhZW0CMTEAAR4OvinudGc4O0SG6ngiGJTyFsOfRae6b-0AfpoVXUpj4ie-hOk7kPx5D-T7ng_aem_IfkNlLyVf2dGh9syUivFsw
