6 zyrtarë të pezulluar në Fier dhe Mallakastër, të dyshuar për shpërdorim detyre dhe lejim ndërtimesh të paligjshme
Agjencia e Mbikëqyrjes Policore (Rajoni Fier-Berat) ka zbatuar një urdhër të Prokurorisë për pezullimin nga detyra të gjashtë zyrtarëve – tre punonjës të policisë në Fier dhe tre inspektorë të IKMT-së në Mallakastër – për dyshime mbi përfshirjen e tyre në veprimtari të paligjshme.
Sipas autoriteteve, ndaj të gjashtë personave është caktuar masa e sigurimit personal “Pezullim nga ushtrimi i detyrës apo shërbimit publik”, si dhe “Detyrim për t’u paraqitur në Policinë Gjyqësore”, me dyshimet për veprat penale “Shpërdorim detyre” dhe “Ndërtim i paligjshëm”.
Punonjësit e pezulluar janë:
- Inspektor Y. K., Ndihmës Specialist / SPZ, Komisariati i Policisë Fier
- Inspektor I. B., Ndihmës Specialist / SPZ, Komisariati i Policisë Fier
- Inspektor D. K., Ndihmës Specialist / SPZ, Komisariati i Policisë Fier
- Kryeinspektor A. X., Inspektorati Kombëtar i Mbrojtjes së Territorit, Bashkia Mallakastër
- Inspektor SH. XH., IKMT, Bashkia Mallakastër
- Inspektor K. Y., IKMT, Bashkia Mallakastër
Hetimet e zhvilluara me metoda speciale nga AMP kanë zbuluar indicie se këta zyrtarë kanë bashkëpunuar për të mundësuar ndërtime të paligjshme në territorin e Bashkisë Mallakastër.
Agjencia e Mbikëqyrjes Policore nënvizon se do të vijojë misionin e saj për forcimin e ligjshmërisë dhe fton qytetarët të raportojnë çdo rast të abuzimit nga ana e punonjësve të strukturave shtetërore në numrin pa pagesë 0800 9090 apo në adresën elektronike ankesa@amp.gov.al.
