Këngëtari i njohur shqiptar, Shpat Kasapi, ka ndërruar jetë në moshën 40-vjeçare, sipas raportimeve të mediave maqedonase, të cilat bëjnë me dije se shkaku ishte një arrest kardiak.
Kasapi u konsiderua për vite me radhë një prej figurave më të dashura të muzikës shqiptare. Ai lindi më 1 maj 1985 në Tetovë, në një familje me traditë muzikore, e cila e frymëzoi të ndërmerrte hapat e parë në këtë rrugë.
U bë i njohur në fillim të viteve 2000, kur me stilin modern, meloditë e lehta dhe energjinë në skenë fitoi menjëherë zemrat e të rinjve. Muzika e tij u përhap shpejt në tregun shqiptar dhe atë kosovar, duke prodhuar hite të shumta si “A më do?”, “Valle Kosovare”, “Dashni pa limit”, “Aroma e saj” e shumë këngë të tjera të suksesshme.
Gjatë karrierës ka marrë pjesë në festivale të rëndësishme dhe ka bashkëpunuar me emra të njohur të skenës. Për vite me radhë mbeti një figurë qendrore e muzikës pop, duke ruajtur popullaritetin falë stilit të tij të veçantë dhe repertorit që vazhdon të pëlqehet edhe sot.
Artisti la pas bashkëshorten dhe një fëmijë.
