Kryeministri Edi Rama ka reaguar menjëherë pas deklaratës së ish-kryeministrit Sali Berisha, i cili ka njoftuar se më 16 maj, dita kur Tirana do të presë liderët e Europës në Samitin e Komunitetit Politik Europian, opozita do të zhvillojë një protestë në bulevardin “Zogu i Parë”.
Berisha u shpreh se kjo protestë do të jetë tërësisht paqësore dhe pa asnjë rrezik për sigurinë e delegacioneve, por theksoi se qëllimi është t’u tregojë liderëve europianë “krimet elektorale të Edi Ramës”, të cilin ai e akuzon si “përbindësh elektoral që nuk respekton as ligjin, as rregullat”.
“Libri i zi i këtyre zgjedhjeve do të shkruhet më 16 maj, ora 17:00, në bulevardin ‘Zogu i Parë’. Aty do të bëhet thirrje botërore për ndërgjegjësimin ndaj padrejtësive zgjedhore në Shqipëri,” deklaroi Berisha.
Ndërkohë, përmes një postimi në rrjetet sociale, Edi Rama publikoi një foto të heroit kombëtar Gjergj Kastrioti Skënderbeut, duke theksuar rëndësinë historike të 16 majit për vendin. “Më 16 maj, të gjithë do të mblidhen nga e gjithë Europa në sheshin tënd o Mbret, dhe ne, stërnipërit e tu, do të jemi krenarë që emri i Shqipërisë do të shqiptohet në të gjitha gjuhët e botës,” shkroi kryeministri.
Për shkak të samitit të 15-16 majit, në Tiranë pritet të ketë masa të rrepta sigurie, bllokime rrugësh dhe trafik të rënduar.
