Papa Françesku ka ndërruar jetë sot në mëngjes, njoftoi Kardinali Kevin Joseph Farrell
Sot në orët e para të mëngjesit, bota katolike humbi udhëheqësin e saj shpirtëror. Papa Françesku, në moshën 88-vjeçare, u nda nga jeta vetëm një ditë pas festës së Pashkës. Lajmin e hidhur e bëri publik Kardinali Kevin Joseph Farrell, i cili në një deklaratë emocionuese theksoi devotshmërinë dhe përkushtimin e papës ndaj Zotit dhe kishës katolike.
“Me dhimbje të thellë më duhet të njoftoj se Ati ynë i Shenjtë, Papa Françesku, ndërroi jetë sot në mëngjes në orën 07:35. Si peshkop i Romës, ai e jetoi jetën në shërbim të Zotit dhe të njerëzimit. Na mësoi se si të ecim në rrugën e Ungjillit me kurajo, përkushtim dhe dashuri të sinqertë, veçanërisht ndaj atyre që janë në skaj të shoqërisë,” u shpreh Farrell.
Papa Françesku u shfaq për herë të fundit publikisht një ditë më parë, kur mori pjesë në ceremoninë e bekimit “Urbi et Orbi” në Bazilikën e Shën Pjetrit. Mesha e Pashkës, e drejtuar nga Kardinali Angelo Comastri, ishte një nga daljet e fundit publike të Atit të Shenjtë.
Po ashtu, gjatë paradites së djeshme, në rezidencën e tij në Shtëpinë e Shën Martës, Papa zhvilloi një takim të shkurtër dhe privat me Zëvendës-Presidentin e SHBA-ve, James David Vance. Sipas Selisë së Shenjtë, takimi shërbeu për të shkëmbyer urime dhe mesazhe paqeje me rastin e festës së Pashkëve.
