Divorci mes Ilir Metës dhe Monika Kryemadhit është bërë zyrtar këtë të enjte, pas një seance gjyqësore të zhvilluar në Gjykatën Civile. Pas një martese shumëvjeçare, gjykata ka vendosur t’i japë fund zyrtarisht lidhjes martesore mes dy figurave të njohura politike.
Fillimisht, seanca ishte planifikuar të mbahej më 21 shkurt 2025, në orën 10:30, por u shty dhe u zhvillua sot, më 11 prill. Në sallën e gjyqit ishte i pranishëm vetëm Ilir Meta, ndërsa Monika Kryemadhi u përfaqësua nga ekipi i saj ligjor.
Sipas një njoftimi të mëparshëm të gjykatës, “Lidhur me çështjen me paditës I.M dhe të paditur M.K., me objekt ‘zgjidhje martese’, është caktuar seanca gjyqësore më 21.02.2025, ora 10:30”, thuhej në vendimin e shpallur më 23 janar.
Padia për divorc është dorëzuar nga vetë Ilir Meta, i cili aktualisht ndodhet në paraburgim që prej 21 tetorit 2024.
