Shorti i Europianit U-17/ Shqipëria në Grupin A me Francën, Gjermaninë dhe Portugalinë
Sot, në ambientet e “Shtëpisë së Futbollit”, u zhvillua shorti për Kampionatin Europian U-17, i cili do të organizohet për herë të parë në Shqipëri. Turneu do të sjellë në vendin tonë disa nga ekipet më të forta të këtij niveli, duke përfshirë Gjermaninë, Francën, Portugalinë, Çekinë, Belgjikën, Anglinë dhe Italinë.
Skuadrat janë ndarë në dy grupe:
- Grupi A: Shqipëria, Franca, Gjermania, Portugalia.
- Grupi B: Italia, Belgjika, Anglia, Çekia.
Faza finale e kampionatit do të zhvillohet në katër stadiume: “Arena Kombëtare” (Tiranë), “Elbasan Arena” (Elbasan), “Arena Egnatia” (Rrogozhinë) dhe “Niko Dovana” (Durrës).
Ndeshja hapëse e turneut do të jetë më 19 maj, ku Shqipëria do të përballet me Portugalinë në “Arenën Kombëtare”, në orën 18:00. Ndërsa finalja e madhe do të zhvillohet më 1 qershor në të njëjtin stadium, duke kurorëzuar kampionin e Europës për këtë kategori.
